جوجل بتفجر قنبلة جديدة في عالم تكنولوجيا الذكاء الإصطناعي وهو شات بوت جديد اسمه Bard أو بارد في محاولة واضحة للتنافس مع النجاح الكبير اللي حققه ChatGPT
وزي شات جي بي تي هيتم بناء بارد على نموذج لغة كبير وبيتم تدريب النماذج دي على مجموعات واسعة من البيانات على الإنترنت عشان ينشىء ردود مقنعة للمستخدمين. وإعلان جوجل عن إطلاق الشات بوت بارد جاي في وقت مهم عشان كان من المعتقد إن شات جي بي تي هيضرب جوجل في مقتل بما إن منتج جوجل الأساسي هو البحث عبر الإنترنت وجي بي تي بيقدر يبحث ويكتب مقالات وينشىء قصص ويجاوب عن أسئلة كان في الأول جوجل هو اللي بيجاوب عنها.
ولو شايف إن الخبر ده عادي أحب ألفت نظرك إن شركة جوجل اللي عامله الشات بوت عندها قاعدة بيانات من أضخم 10 قواعد بيانات في العالم فيها تقريبًا كل بياناتك زي تاريخ البحث على الإنترنت سواء في جوجل أو يوتيوب على كل أجهزتك حتى لو مسحته وعندها ملف بكل معلوماتك زي جنسك وعمرك وهواياتك ومهنتك واهتماماتك وحالتك الاجتماعية ووزنك المحتمل ودخلك وحتى موقعك ولو عايز تجرب إدخل على اللينك ده google.com/maps/timeline?pb وهتلاقي الأماكان اللي إنت زورتها في كل مره فتحت فيها اللوكيشن بتاعك.
وطبعًا مش محتاج أقولك إن الشات بوت هيتغذى من نفس قاعدة البيانات وهيبقى عارف عنك كل حاجه ولذلك من المتوقع يكون أقوى من ChatGPT وإجاباته ممكن تبقى دقيقة أكتر ولو عايزين حلقة عنه والمخاطر اللي ممكن يسببها اكتبلنا في التعليقات.
إرسال تعليق
www.feanfe.com